Home» Cinema »Feature

जे भो राम्रै भो

नेपाली चलचित्रको आकर्षण कस्तो छ भन्ने कुराको उदाहरण हेर्न नेपाली चलचित्रमा स्थापित केही नाम हेर्दा स्पष्ट हुन्छ । राजेश हमाललाई नेपाली चलचित्रमा अभिनय गर्नु आवश्यक थिएन । उनले चाहेका भए,  यहाँभन्दा नाम र दाम अरु पेशामा नै कमाउन सक्थे । तर उनी अभिनयमा तानिए । डा. भोला रिजाललाई कसले बिर्सन सक्छ नेपाली चलचित्रको योगदानका लागि ! उनले स्थापना गरेको मानसरोवर फिल्म्स एक समय यस्ता चलचित्र निर्माण गरेको थियो, जसले सिने उद्योगलाई वास्तविक रुपमा नै नयाँ जोश र जाँगर दिएको थियो ।

यहाँ हामी त्यस्तो आकर्षणको कुरा गरिरहेका छौँ, जो आज यो उद्योगमा रहे पनि नरहे पनि एक समय आफ्नो उपस्थितिले सबैलाई प्रभाव पार्न सफल भएको थियो । तिनको विगत कस्तो थियो, तिनले चलचित्र उद्योगमा आउनुअघि कस्ता काम गरेका थिए भन्ने जिज्ञासा तपाईलाई पनि हुनसक्छ । आउनुस्, आज हामी चलचित्रसँग सम्बद्ध ती ताराहरू विगत जानौँ जो यो क्षेत्रमा आउनु अघि आफ्नो जीवनमा वास्तविक भूमिका निभाउने गर्दथे ।

चर्चित नायक शिव श्रेष्ठ यो क्षेत्रमा आउनुअघि विराटनगरका 'दादा' मानिन्थे । त्यतिबेला उनको शौख थियो- छाती र पाखुराका 'मसल' खाइलाग्दो बनाउने । यसै कारणले शिब आफ्नो पहिलो चलचित्र 'जीवनरेखा' मा खलनायक बन्ने 'मूड' मा थिए तर भाग्यको खेल हेर्नुहोस्, निर्देशक प्रकाश थापाले उनलाई देख्ने बित्तिकै नायक बनाइदिए । उनी सिन्दूरका नायक विश्व बस्नेतलाई समेत कहिलेकाहीँ कोट पठाइदिने गर्दथे ताकी आफ्ना साथीहरुमाझ विश्वले फलानो फिल्ममा मेरो कोट लगाएको छ भनेर धक्कु लगाउन सकून् ।

यस्तै अर्का सफल नायक तथा निर्माता भुवन के.सी. सिनेमाको रङ्गीन संसारमा आउनुअघि एउटा ट्राभल एजेन्सीमा काम गर्थे । त्योअघि उनी रेडियो नेपालबाट स्वर परीक्षा उत्तिर्ण गरी राम्रा गायकका रूपमा पनि सफल भइसकेका थिए भने भलिबलका उत्कृष्ट खेलाडी थिए ।

अभिनय प्रतिभाका धनी तर भाग्यले ठगिएका नायक रवीन्द्र खड्का सानै छँदा आफ्नो गाउँ घरमा नाटक देखाउने गर्दथे । वि.सं.२०३८/२०३९ सालतिर उनले महान्यायाधिवक्ताको कार्यालयमा कार्यरत रहेर सरकारी जागीरको अनुभव पनि लिइसकेका छन् ।

यस्तै सरकारी जागिरको स्वाद चाख्ने चलचित्रकर्मीहरूमा निर्देशक चेतन कार्की पनि छन् । हिन्दी साहित्यका स्नातकोत्तर तथा जीव विज्ञानमा स्नातक निर्देशक कार्कीले वि.सं. २०२५ मा यो क्षेत्रमा प्रवेश गर्नुअघि केही वर्ष मत्स्य विकास अधिकृतका रूपमा सरकारी सेवाको अनुभव लिइसकेका थिए ।

चर्चित हाँस्य जोडी मदनकृष्ण र हरिवंशले पनि जागिरे जीवनको अनुभव छ । दुवै यस क्षेत्रमा आउनु अघि नेपाल राष्ट्र बैंकमा कार्यरत थिए ।

चर्चित नायिका तथा निर्मात्री करिश्मा मानन्धर आफ्नो पहिलो चलचित्र 'सन्तान' अघि काठमाडौंमा त्यतिबेला छ्यापछ्याप्ति खोलिएका गार्मेन्ट कारखानामा काम गर्थिन् । 'सन्तान' पछि हालसम्म उनी निरन्तर यसै क्षेत्रमा संलग्न छिन् ।

वरिष्ठ निर्देशक यादव खरेल रेडियोका कार्यक्रम प्रस्तोता थिए । पछि परिवार नियोजन संघका कार्यकारी निर्देशक तथा तत्कालीन शाही नेपाल चलचित्र संघका महाप्रबन्धक मात्र नभई एक समय काभ्रेबाट आम-निर्वाचनमा माननीयका लागि चुनाव लडेका थिए ।

अर्का वरिष्ठ निर्देशक स्वर्गीय प्रकाश थापा नेपाली चलचित्र क्षेत्रमा प्रवेश गर्नुअघि हिन्दी चलचित्रहरूमा अभिनय गर्थे । लगभग तीन दर्जन जनि हिन्दी लगायत अन्य भाषाका चलचित्रहरूमा अभिनय गरे पश्चात् नेपाली चलचित्रको निर्देशन जिम्मेवारी पाएका थिए । पहिलो चलचित्र तात्कालीन शाही नेपाल चलचित्र संस्थानको 'मनका बाँध' थियो ।

चलचित्र निर्देशक नारायण पुरीले विभिन्न चलचित्रको यूनिटमा सहयोगीको भूमिका निर्वाह गरेर चलचित्र निर्देशक हुनुअघि केही समय चलचित्र पत्रकारितामा पनि अनुभव हासिल गरेका छन् ।

नेपाली चलचित्र क्षेत्रमा फौजी सेवामा रहेका व्यक्तिहरूको निकै नै संलग्नता रहेको पाइन्छ । नायक धीरेन शाक्यले यस क्षेत्रमा आउनु अघि भारतीय सेनामा काम गरेका थिए । यस्तै चर्चित कलाकार सन्तोष पन्त पहिले शाही नेपाली सेनामा कार्यरत थिए । यसैगरी केही टेलिचलचित्र तथा चलचित्रमा देखापर्ने कलाकार भीमबहादुर थापाले पनि शाही नेपाली सेनामा सेवा गरेका हुन् । यस्तै नायक अर्जुनजङ्ग शाही प्रहरी सेवामा छन् ।

खलनायकहरूमा सुनील थापा नेपाली चलचित्रमा अभिनय गर्नुअघि हिन्दी चलचित्रहरूमा अभिनय गर्दथे भने भारतीय चलचित्र उद्योगमा प्रवेश गर्नुअघि भारतीय फूटबल क्लबका राम्रा खेलाडी मानिन्थे ।

अर्का खलनायक पवन मैनाली औषधि बेच्ने गर्दथे, चलचित्र क्षेत्रमा प्रवेश गर्नु अघि । त्यस्तै नायक श्रीकृष्ण श्रेष्ठको पनि औषधि पसल नै थियो तर चलचित्रमा अभिनय थालेपश्चात् उनी पसलमा देखिएनन् ।

केही चलचित्र र टेलिभिजनमा देखापरेका नायक किरणप्रताप के.सी. व्यवसायिक रूपमा इन्जिनियर भएपछि यस क्षेत्रमा अभिनयको शौखले आएका हुन् । भनिन्छ किरणप्रताप र राजेश हमालका पारिवारिक प्रतिस्पर्धा नै यसको प्रमुख कारण हो, नातामा यी दुइ कलाकार आमा-आमाका सम्बन्धबाट दाजुभाइ हुन् । राजेश हमाल भने चलचित्रमा खेल्नुअघि भारतको नयाँदिल्लीमा र्‍याम्प मोडलिङ गरेका थिए ।

चलचित्रका निर्माता तथा गीतकार डा. भोला रिजाल डाक्टरी गर्छन् भन्ने त धेरैलाई थाहा होला तर उनी डाक्टर हुनुअघि रेडियो नेपालमा पनि गीत गाउँथे र उनका गीत निकै चर्चित थिए भन्ने कुरा धेरै कमलाई थाहा हुनसक्छ ।

यसरी समष्टिमा हेर्दा नेपाली चलचित्र क्षेत्रको आकर्षा अन्य पेशामा रहेका प्रबुद्ध वर्ग माझ पनि रहेको छ । त्यही आकर्षणका कारण आफ्नो पेशा अत्यन्त फापिलो अवस्थामा रहेकै बेलामा पनि चलचित्र निर्माण, अभिनय तथा अन्य पेशामा संलग्न हुन पाउँदा उनीहरुले गर्वको अनुभव गरेको हामी पाउँछौँ । त्यसैले त हामी भन्न सक्छौँ, जे भो राम्रै भो ।

 
Click Here To Read Previously Posted Article    Click Here To Read Next Article          
 
More on Feature
Related Tags:
रोचक क्या बात ! पेज 3 ग्ल्यामर फिल्म फेस्टिबल नवीनता रोमान्स कन्ट्रोभर्सी सोच निर्देशक पार्टी घोषणा सेक्स अभिनेत्री कार्यक्रम अभिनेता सञ्चारकर्मी प्रविधि
Browse Tags in Other Group
 
 
Tags in Technology
gadgets mobile digital camera phone software people speak laptop communication Filming
Browse all Tags in Group
Tag groups: cinema, city sightings, city updates, fashion & grooming, health, misc, music, relationship, technology, television, weird & interesting, work and office,