Home» Cinema »Feature

उत्तमले ल्याए सिनेमा क्रान्ति !

- अच्युत कोइराला

मधेशका एक युवाले नेपाली चलचित्र उद्योगको स्वरुप परिवर्तन गर्ने दाबी गरेका छन् । २० वर्षीय उत्तम न्यौपानेले गरेको तीन महिने खोजपछि एउटा साधारण भिडियो दृश्यलाई सिनेमास्कोपको पर्दामा देखाउन मिल्ने दाबी गरेका हुन् । उनले यो कुरालाई मंगलबार जयनेपाल सिनेमामा 'अल्पविराम'को परीक्षण सफलतापूर्वक सम्पन्न गरेपछि बाहिर ल्याएका हुन् । उनको यो दाबीलाई अल्पविरामका निर्देशक नारायण पुरीले समेत पुष्टि गरेका छन् ।

उनले सिनेमाको सम्पादन गर्ने विभिन्न विदेशी सफ्टवेयरहरु प्याराभिजन तेस्रो, सेल्युल्वाइड, एडब एक्सप्रेस, डीभिक्स तेस्रो, सिनेम्याटि्रक्स आदिको सम्मिश्रण गरी तयार पारेका प्लग-इनहरुको सहायताले ४:३ अनुपातमा रहेका भिडियोहरुलाई १६:९ को फराकिलो पर्दामा एभीआई फरम्याटबाट अल्पविराम चलचित्रको सफल परीक्षण प्रदर्शन गरेका हुन् । यसले १६ मिमिमा खिचिएका चलचित्रलाई फराकिला पर्दा (सिनेमास्कोप)मा प्रदर्शन गर्न मिल्ने न्यौपानेले दाबी गरेका छन् ।

अल्पविरामलाई डल्बी सराउण्ड सिस्टममा ढाल्ने प्रक्रियामा सहभागी हुँदै गर्दा उनले भिडियोलाई पनि सिनेमास्कोपमा देखाउन मिल्छ कि मिल्दैन भनी परीक्षण गर्दा यो सफलता हात पारेको न्यौपानेले बताएका छन् । अल्पविरामलाई उनले नै ५.१ सराउण्ड साउण्डमा पनि सफलतापूर्वक परीक्षण गरिसकेका छन् । यो परीक्षणमा दृष्य (भिडियो) र ध्वनि (अडियो) दुवैको स्तरीयतामा कत्ति पनि फरक नआएको उनले जानकारी दिएका छन् ।

१० कक्षा पढ्दापढ्दै एक पटक डीभीडीमा हिन्दी सिनेमामा पाउजूको 'सराउण्ड साउण्ड' सुनेपछि नेपाली चलचित्रमा यस्तै किसिमको स्थानीय प्रयोग गर्ने रुचि उनमा बढेको थियो । त्यही भएर उनले नेपालका प्रख्यात साउण्ड इन्जिनियर प्रदीप उपाध्यायसँग एक महिने ध्वनि शिक्षा तथा इन्टरनेटमा दुइ वर्षे ध्वनि इञ्जिनीयरिङको कक्षा लिएका थिए । यसलगत्तै राजधानीका बीएमआई र सप्तक रेकर्डिङ स्टुडियोमा काम गर्न शुरु गरेका न्यौपाने बच्चादेखि नै विद्युतीय सामग्रीको संरचना अध्ययन गर्न रुचाउने व्यक्ति थिए । उनले यस्ता सामग्रीको निर्माण प्रक्रिया र काम गर्ने तरिका अध्ययन गर्दा बच्चा बेलामा नै ७० वटा क्याल्कुलेटरहरु फुटालेका थिए भने थोत्रा र बिग्रेका रेडियो/टीभीहरु कौडीका भाउमा किन्दै तिनलाई बनाउँदै बिगार्ने गर्थे ।

सिनेमामाथि उनको यो उपलब्धिलाई महत्वपूर्ण ठान्दै चलचित्र विकास बोर्डले उनलाई थप अध्ययनका लागि १० लाख रुपियाँ उपलब्ध गराउने बताइएको छ । तर बोर्डले अहिले तत्काल निर्णय गरिनसकेको तर उनको प्रतिभामाथि प्रशस्त सम्भावना र विश्वास रहेको बोर्ड सम्बद्ध व्यक्तिले बताएका छन् ।

साधारण भिडियोलाई पनि सिनेमास्कोपमा ढाल्न सकिने उनको विश्वासलाई पहिले त केही व्यक्तिले गँजडीको गफ ठानेका थिए । केही व्यक्तिले त उनलाई असहयोग गरेको
पनि बताए । तर उनको यो सफलतालाई भारतबाट प्रसारण हुने जूम टेलिभिजनले प्रसारण गरेको उनका निकटवर्ती व्यक्तिहरुले उनलाई जानकारी दिएको उत्तमले बताए । "मैले त हेर्न पाइनँ, तर साथीहरुले मलाई बधाइ चाहिँ दिएका थिए", उत्तमले बताए । उनको यो प्रतिभाबाट प्रभावित भएर हलिउडअनलाइनटीभी र डेभिड डेनी अडियो कन्सल्टेन्सीजस्ता संस्थाले अमेरिका निम्त्याएको समेत उनले इनशाडटकमसँगको भेटमा बताए ।

अहिले यो सफलतापछि उनी एउटा यस्तो हार्डवेयर बनाउन लागिपरेका छन्, जसले सिनेमा हलमा डीटीएस वा डल्बी सराउण्ड साउण्डलाई 'डिकोड' गरी प्रदर्शन गर्न सकोस् । उनले सिनेमाको रिलमा नेपालबाट नै ५.१ सराउण्ड साउण्ड 'इन-कोड' गर्न सकिन्छ कि भन्ने विषयमा पनि अध्ययन गरिरहेका छन् । उनको यो काममा चलचित्र निर्देशक नारायण पुरीले सघाएकोमा उनी निकै अनुगृहित छन् ।

देवी न्यौपाने र खड्गबहादुर न्यौपानेका एक मात्र सुपुत्रका रुपमा चन्द्रनिगाहपुरमा जन्मिएका उत्तमले स्थानीय जनप्रिय मा.वि. हरिनगर मैराबाट एसएलसी तथा पिपल्स क्याम्पस काठमाडौँबाट आईकमसम्मको अध्ययन गरेका छन् ।

अबका केही महिनामा नेपालमै पहिलो अडियो/भिडियो सफ्टवेयर निर्माण गरेर नेपाली मनोरञ्जन उद्योगमा स्तरीयता वृद्धिमा सहयोग गर्ने उनको रहर छ । उनको यो रहर पूरा होस् !

उनले तयार पारेको 'आमा' हार्डवेयर, जसबाट सिनेमा भवनमा सिनेमास्कोप चलचित्र प्रदर्शन गर्न सहज पुर्‍याउने छ ।

 
Click Here To Read Previously Posted Article    Click Here To Read Next Article          
 
More on Feature
Related Tags:
प्रविधि सेलेब्रिटी अभिनेता समारोह रिलिज सेक्स सुटिङ अभिनेत्री हल्ला पेज थ्री
Browse Tags in Other Group
 
 
Tags in Cinema
सेक्स अभिनेता अभिनेत्री सेलेब्रिटी रिलिज समारोह सुटिङ हल्ला पेज थ्री प्रविधि
Browse all Tags in Group
Tag groups: cinema, city sightings, city updates, fashion & grooming, health, misc, music, relationship, technology, television, weird & interesting, work and office,