Home» City Life »Updates

ऐश-अभिको पशुपति भ्रमण

संसारकै सबैभन्दा लायकदार कलाकार दुलाहा-दुलही अभिषेक बच्चन र ऐश्वर्या रायको बिहे खिच्न भारतीय टेलिभिजन च्यानल, पत्रिका तथा इन्टरनेटका सम्वाददाताहरु आतुर छन् । तर बच्चन परिवार यो मामिलामा यति कञ्जुस देखिएको छ कि एउटा सानो सूचना पोख्नसमेत मानिरहेको छैन । यस्तो स्थितिमा अभिषेक बच्चन र ऐश्वर्या राय नेपाल आउने खबर फैलिएपछि भारतीय मिडियाले गर्न नसकेको काम कतै हामीले पो सकिहाल्छौँ कि भन्ने उत्साहका साथ अधिकांश प्रमुख पत्रिका तथा टेलिभिजन च्यानलका पत्रकारहरुको भीड त्रिभुवन अन्तर्राष्ट्रिय विमानस्थल र पशुपति क्षेत्रमा लागेको थियो ।

खबर पनि कतिसम्म पक्का जस्तै थियो भने उनीहरु ५:४५ बजे अनील अम्बानीको चार्टड विमानद्वारा अन्तर्राष्ट्रिय विमानस्थलमा उत्रने छन् । त्यसपछि पशुपतिनाथ मन्दिरमा उनीहरुको भव्य पूजा शुरु हुनेछ र राति ९:१५ बजे सोही चार्टड विमानद्वारा उनीहरु मुम्बई फर्कने छन् ।

त्रिभुवन विमानस्थलमा अभि-ऐशको तश्वीर पाउने आशामा केही उत्साही पत्रकारहरु त बिहान ११ बजेदेखि नै क्यामेरासहित तम्तयार थिए । अरु पनि ४:१५ देखि विस्तारै त्यहाँ आउन थाले । कोही पत्रकार भने पशुपतिनाथ मन्दिर परिसरतिर पनि घुमिरहेका देखिन्थे ।

ठीक साँझ ४:३० मा प्रहरीको एउटा ट्रक पशुपतिनाथमा आएर रोकियो । दक्षिण ढोकाको सामुन्नेमा नै पन्ध्र मिनेट रोकिएपछि ट्रक त्यहाँबाट बाहिरियो । केही पत्रकारले ट्रक रोकिनुको कारण सोधपुछ गरे पनि त्यो ट्रक ऐश-अभिकै सुरक्षाका लागि नभएको कुनै पुख्ता प्रमाण फेला परेन । केही पत्रकारहरुको तर्क थियो- भारतमा जसरी बच्चन परिवारले सूचना लुकाएको छ, त्यसै गरी यहाँ पनि त्यही नीति अख्तियार गरिँदैछ ।

केही पत्रकार त्रिभुवन अन्तर्राष्ट्रिय विमानस्थलमा अझै कुरिरहेका थिए । विमानस्थलमा नेपालस्थित भारतीय दूतावासको गाडी देखियो । दूतावासका कर्मचारी चिन्ने केही पत्रकार त्यहाँ लम्किए । दूतावासका कर्मचारीहरुले एउटा सानो 'प्रोटोकल'का लागि मात्र आएको बताइरहेका थिए । केही पत्रकारले तिनीहरु विमानस्थलमा देखिनु नै उनीहरु आउनसक्ने प्रमुख कारण मानिरहेका थिए ।

अब घडिको सुइले ठीक ५:१५ बजायो । विमानस्थलमा राखिएको टेलिभिजन स्क्रीनले एउटा चार्टड विमानको ओर्लने समय देखायो । पत्रकारहरुले आफ्ना तीर-भाला (क्यामेराहरु) ऐश-अभिको तश्वीरका लागि सोझ्याए । तर, केही सुरक्षा अधिकारीहरुले त्यो विमानमा अभि-ऐश नभएको बताए । तर पनि पत्रकारहरु त्यति निराश देखिएनन् । प्लेनबाट ओर्लिएका अतिथिहरु अझै आइपुगेका थिएनन् । तिनलाई कुरे । त्यसपछि, जे ट्राभल्स खोज्दै आएका जिन्दल परिवार आफ्नो मालसामानसहित देखिए । यी
अतिथिहरु चौधरी परिवारका आशादीप निर्वाणा चौधरीको बिहेका लागि आएका रहेछन् ।

ज्याद्रा पत्रकारले अझै ती व्यक्तिलाई पनि छाडेनन् । एक पत्रकारले जिन्दल परिवारकी सबैभन्दा राम्री केटीतिर प्रश्न फ्याँके- "हैन, तपाइँहरुसँगै ऐश-अभि आउने कुरा थियो, तिनलाई कतै देख्नु भयो कि ?" बोल्नमा बिछट्टकी रै'छन् ती युवती । भनिहालिन्- "ए, उ आएन । उसले मलाई भन्दैथियो, त्यहाँ मेरो साटो तिमीले नै बोलिदिनू ।" त्यसपछि तिनको गाडी हुइँकियो ।

केही पत्रकार ऐश-अभि आउने आशामा अझै पनि विमानस्थलमा दायाँबायाँ गरिरहेका थिए, तर अधिकांश पत्रकार चाहिँ दोस्रो अप्रिल फूल मनाउँदै आफ्नो गन्तव्य फर्किए । केही पत्रकारहरुलाई उनीहरु आउने कुरामा यति पक्का थियो कि राति साढे नौ बजेसम्म पनि पशुपतिनाथको मन्दिर परिसरमा घुमिरहेका थिए ।

-अच्युत कोइराला



भुत्ते भयो हतियारः विमानस्थलमा भेला भएका पत्रकारहरु


झुक्याउने मेसिनः यही स्क्रीनमा देखिएको मु्म्बई फ्लाइटले पत्रकारहरुलाई विश्वस्त पारेको थियो- ऐश्वर्या राय र अभिषेक बच्चन अवश्य आउनेछन् ।


खोदा पहाड, निकला चुहाः चार्टड गरिएको जहाजबाट आएका मुम्बईका जिन्दल परिवार ।

 
Click Here To Read Previously Posted Article    Click Here To Read Next Article          
 
More on Updates
Related Tags:
hi-life सेलेब्रिटी हल्ला समलिङगी मोबाईल माओवादी पेट्रोल awards संविधानसभा crisis celebrity अनुभव streets festival events
Browse Tags in Other Group
 
 
Tags in City Updates
crisis events hi-life अनुभव festival celebrity माओवादी मोबाईल streets पेट्रोल समलिङगी सेलेब्रिटी हल्ला awards संविधानसभा
Browse all Tags in Group
Tag groups: cinema, city sightings, city updates, fashion & grooming, health, misc, music, relationship, technology, television, weird & interesting, work and office,