Home» Cinema »Feature

अब चार्लिज एञ्जेल्स नेपालीमा



प्राविधिक संघद्वारा आयोजित नेपाली चलचित्र महोत्सव तथा अवार्ड कार्यक्रममा उनी धडकन चलचित्रको सम्वाद लेखक तथा मैदान चलचित्रको पटकथाकारका रुपमा उत्कृष्ट पाँचभित्र परेका छन् । तर उनी खुशी भने छैनन् । अरुका लागि सफल चलचित्र लेखे पनि आफूले लगानी गरेको तथा लेखेको चलचित्र 'अभिमन्यू' चलचित्र गएको वर्षको जनआन्दोलन भाग २ मा 'शहीद' भएर आठ लाख घाटामा परेपछि उनमा खुशी छाउन नसकेको हो ।

यी ती लेखक हुन्, जसले अरुलाई धडकन, माया नमार, अजम्बरी नाता, दादागिरी, निखिल दाइ, क्रान्ति, भाइभाइ आदि चलचित्र लेखिदिएर निर्माताहरुलाई मालामाल बनाए तर आफूले त्यस्तै किसिमको चलचित्र बनाउने भएर डुबे । यिनको नाम हो- मौनता श्रेष्ठ । तर उनी अहिले मौन छैनन् । डुबेको आठ लाख फिर्ता ल्याउन उनले अहिले नयाँ कथा जोड्दैछन् र सिनेमाको नाम राखेका छन्- आँधितुफान



सफल सिनेमा लेखक तर असफल चलचित्र निर्माताका रुपमा चिनाउन रुचाउने मौनताले आँधितुफान चाहिँ चार्लिज एञ्जेल्सबाट उडाएको लुकाएनन् । "त्यसको एक-एक सिन मैले मेरो सिनेमामा राख्दैछु । मेरो सिनेमाका नायिकाहरुले तिनै कपडा लगाउने छन्, त्यस्तै किसिमले । कथा नेपाली पारामा भए पनि एउटा मिसनका लागि तीन सुन्दरीहरुको त्यही भिडन्त देखाउँदैछु भने मैले कथा चोरेको होइन किन भन्नू ?" उनको स्वरमा दृढता सुनिन्छ ।

त्यसो त आँधितुफानअघि च्याम्पियन चलचित्रको घोषणा गरिसकेका यिनले त्यस विषय र कथालाई एकातिर थाति राखेर तगडा एक्सन फिल्म बनाउन ध्यान दिइरहेका छन् । च्याम्पियन किन ढिला त ? "खासमा मैले खोजेका कलाकारहरु ज्यादै व्यस्त भए । त्यही भएर हिरो ओरिएण्टेड फिल्मभन्दा पनि हिरोइन ओरिएण्टेड बनाउन त्यो रोकेर यो फिल्मको घोषणा गरेँ," मौनता बताउँछन् । 'आँधितुफान' नामसँग 'थ्री ब्युटिफुल एञ्जेल्स' ट्यागसमेत झुण्ड्याउने उनले सोचिसकेका छन् ।

यस चलचित्रमा ऋचा घिमिरे, पूजाना प्रधान, विक्रान्त बस्नेत, उमेख खड्का, राजेश ढुंगाना आदिको अभिनय रहनेछ । अर्की एक नायिकाका रुपमा मोडल सराह गुरुङसँग कुराकानी भइरहेको तर उनले अहिले कुनै स्पष्ट निर्णय दिइनसकेको निर्माता तथा लेखक मौनताले इनशाडटकमलाई बताए ।

यता यो चलचित्रको द्वन्द्व नेपाली चलचित्रकै इतिहासमा सबैभन्दा रोचक हुने दाबी एन्.बी. महर्जनले गरिरहेका छन् । चलचित्रका निर्देशक भने महेन्द्र बुढाथोकी रहनेछन् ।

१०/१२ वर्षको चलचित्र करियरमा ५० भन्दा बढी चलचित्र लेखिसकेका मौनताले नेपाली चलचित्र सबै वर्गका व्यक्तिमाझ लोकप्रिय हुन नसक्नुमा निर्देशकको कल्पनाशीलताको अभाव मानिरहेका छन्, भन्छन्- "असक्षम निर्देशकहरु, कन्सेप्ट चयनमा गडबडी, पुरानो शैली हावी हुनु, नयाँ शैलीमा जान नरुचाउनु, तल्लो वर्गका लागि मात्र चलचित्र बनाउनु, प्राविधिक रुपमा पुरानै तरिका अपनाउनु, चलचित्र हलहरु पनि पुरानै हुनु र अत्याधुनिक नहुनु र शिक्षित वर्गहरु यस क्षेत्रमा आउन नरुचाउनु नै नेपाली चलचित्र माथि उठ्न नसक्नुका कारण हुन् ।"

यति थाहा हुँदाहुँदै उनले 'अभिमन्यू' पुरानै शैलीमा बनाए, किन त ? "त्यो नै मेरो जिन्दगीको सबैभन्दा ठूलो गल्ती थियो । मलाई थाहा थियो, यस्तो चलचित्र बनाएर उद्योग फस्टाउँदैन । तर पैसाको रिस्क कसले लिने भन्ने सोचले काम गर्‍यो । त्यही शैलीका चलचित्र अरुलाई लेखिदिँदा चल्यो भने मैले बनाउँदा किन नचल्ला भनेर त्यस्तै शैलीको बनाएँ तर आन्दोलनमा 'शहीद' भयो ।"

त्यही सोच र शैलीको चलचित्र नबनाउन उनले चार्लिज एञ्जेल्सको डीभीडी अनेक पटक हेरेको उनले बताए । "यसमा ड्रेसअपदेखि लिएर दैनिक हिरोइनहरुको सिनेमा एक्टिभिटीमा सुधार हुनेछ । ताकि पर्दामा हे
र्दा नायिकाहरु फोहोरी नदेखिऊन् । नेपाली फिल्म पर्दामा हेर्दा फोहोरी देखिन्छ, त्यस्तो नहोस् भन्ने मान्यताले अहिले म काम गरिरहेको छु", उनले बताए ।

चार्लिज एञ्जेल्स नै उनले किन नेपाली भाषामा बनाउन खोजिरहेका छन् त ? "यसको प्रमुख उद्देश्यः पढेलेखेका व्यक्तिहरुले हेरिदिऊन् भन्ने नै हो । प्लस टु पढेका युवाहरुलाई हलसम्म तान्ने उद्देश्य नै हो", मौनताले भने- "यस पटक विज्ञापनमा पनि अलि बढी नै खर्च गर्नेछु । यस पटक नयाँ-नयाँ स्रोत परिचालन गर्नेछु ।"

 
Click Here To Read Previously Posted Article    Click Here To Read Next Article          
 
More on Feature
Related Tags:
घोषणा क्या बात ! फिल्म फेस्टिबल नवीनता ग्ल्यामर कन्ट्रोभर्सी निर्देशक पार्टी अभिनेता पेज 3 रोचक रोमान्स अभिनेत्री सोच सञ्चारकर्मी कार्यक्रम सेक्स प्रविधि
Browse Tags in Other Group
 
 
Tags in Misc
Books Home
Browse all Tags in Group
Tag groups: cinema, city sightings, city updates, fashion & grooming, health, misc, music, relationship, technology, television, weird & interesting, work and office,