Home» Cinema »Feature

अकबर जोधाः जहाँ वीरबल चाहिएन

१६ औँ शताब्दीका भारतीय शहन्शाहको हल्ली खल्ली काठमाडौँका सडकमा ! यो पनि सम्भव हुन्छ, यदि त्यो सिनेमा बनेर प्रदर्शन हुन्छ भने !

शुक्रबारबाट हाम्रो देशको राजधानीमा "अकबर जोधा" रिलिज भएपछि यसले स्वभाविक प्रतिक्रिया पायो किनभने यहाँ ऋतिक रोशन थिए, ऐश्वर्या राय बच्चन थिइन् । यी दुइले यसअघि "धूम दोस्रो"मा करेन्ट दौडिने ओठे चुम्मा खाएपछि यिनको जोडीलाई एक पटक हेर्नै पर्ने राजधानीका युवाहरुको मन थियो, जुन पूरा भएको छ ।

यद्यपि यी युवालाई भारतीय इतिहासमा कुनै रुचि छैन । किनभने, पृथ्वीनारायण शाहलाई त मान्दैनौँ भन्ने युवाहरु अब अकबरका कुरा कहाँ सुन्छन् र ! तर जब त्यहाँ ऋतिक र ऐश्वर्या बोल्न थाल्छन्, जब पर्दामा तिनको प्रेम मौलाउँदै जान्छ, जब त्यहाँ पनि सास भी कभी बहु थीको झलक आउँछ- तिनले इतिहास बिर्सछन्, सिमाना भुल्छन् र सिनेमासँगै एकीकृत हुन्छन् ।

आशुतोष गोवारिकरले लगान बनाए, त्यो पनि नेपालीले रुचाए । स्वदेश बनाए, त्यो पनि पचाए र अब अकबर जोधाका रुपमा आएका छन्, सम्भवतः यसलाई पनि स्वाद लिनेछन् । किनभने अकबर जोधा भारतीय इतिहास बताउँदैन, बरु उसले हिन्दू-मुश्लिम मिलेर बस्नुपर्छ भनेर सिकाउँछ । नारीहरु कुनै कामका हुँदैनन् भन्दैन बरु नारीका कुरा सुन्छ । राजा भइसकेपछि प्रजाका व्यथा बुझ्नर्ुपर्छ भन्छ । त्यसैले भिन्न सीमा र समयका राजा भए पनि नेपाली युवाले तिनका खास कुरा रमाइलो मान्छ ।

यो सिनेमाले सबैलाई छुन्छ किनभने यसमा हाल्नुपर्ने मसलाका लागि लेखक हैदर अली र निर्देशक आशुतोष गोवारीकरले कुनै कन्जुस्याइँ गरेका छैनन् । यसमा भव्यतम् द्वन्द्व छन्, जसले "ट्रोय"लाई बिर्साइदिन्छ, यसमा नाटकीयताको कमी छैन, जसले "कभी खुशी कभी गम"लाई भुलाइदिन्छ ।

लामो सिनेमा भए पनि तपाइँलाई दिक्क लाग्ने छैन । अर्थात्, समग्रमा चलचित्रले तपाइँलाई मनोरञ्जन दिलाउने छ । तर अन्त्यमा तपाइँलाई त्यो सौर्न्दर्यपछि चाहिँ एउटा खालीपन छोडेर जानेछ । जहाँ तपाइँले सोच्नु हुन्छ, सिनेमा लामो भइकन, सिनेमा राम्रो भइकन, सिनेमा उत्तम भइकन पनि सर्वोत्तम हुन सकेको छैन । किनभने हज्जारौँको भीड, भयङ्कर द्वन्द्व दृश्य, कुत्कत्याउने प्रेम-गाथा हेरिसकेपछि तपाइँलाई अन्तिममा त्यो खालीपन चाहिँ लाग्छ ।

सिनेमामा केही दृश्य छन्, जसले निकै छुन्छन् । अकबरको नाङ्गो शरीर देखेर लोभिएकी जोधा, प्रेमको टुशा पलाउँदै गर्दा अकबरको मुटु कँपाउने निर्णय जसमा उसले आफ्नो भाइलाई दरबारको माथिल्लो भागबाट नमरुञ्जेल माथिबाट फ्याँक्न लगाउँछ । जोधाको स्वीकृतिबेगर अकबरले जोधालाई नछुने कसम, सुफी गायनबाट मुग्ध भएपछि नाचेको अकबर, सासु र बुहारीको झगडा- यी सबैलाई निर्देशकले राम्रोसँग न्याय गरेका छन् ।

छायाँकन यसको गज्जब छ, भव्यतालाई अझ भव्यतम् तरिकाले पस्किन सिने टोलीले कुनै कञ्जुस्याइँ गरेको छैन । दरबारको भव्यतालाई जोधाको आँखाले देखाउनु र जोधालाई पहिलो पटक अकबरले प्रणय-प्रस्ताव राख्दा झलमल्ल हुने दृश्य पनि उत्तिकै प्रभावित पार्ने किसिमको छ ।

लास्टाँ त्यै भनेझैँ तपाइँले भन्नु हुँदो हो, यो त ज्यादै प्रभावित भएछ । ठीक भन्नुभो, किनभने हामीकहाँ यस्तो फिल्म बन्दैन र अरुका कुरा हेरेर प्रशंसा गर्नुबाहेक अन्य विकल्प छँदैछैन । त्यसैले त यो राम्रो फिल्म बनेको छ, जसलाई वीरबलको सहयोग चाहिएको छैन । बरु वीरबल भएको भए, खिचडी पो हुन्थ्यो कि !

 
Click Here To Read Previously Posted Article    Click Here To Read Next Article          
 
More on Feature
Browse Tags in Other Group
 
 
Tags in Cinema
सेक्स अभिनेता अभिनेत्री सेलेब्रिटी रिलिज समारोह सुटिङ हल्ला पेज थ्री प्रविधि
Browse all Tags in Group
Tag groups: cinema, city sightings, city updates, fashion & grooming, health, misc, music, relationship, technology, television, weird & interesting, work and office,
 
 
Your Name: City Country
Your Email: