Home» Music »Feature

भविष्य खोज्दै नेपालमा
- अच्युत कोइराला

कोही सुरक्षित भविष्य खोज्दै अमेरिका पुग्छन्, अनि कोही चाहिँ देखिएको र भएको सुरक्षित भविष्य पनि छोडेर स्वदेश आइपुग्छन् । पछिल्लो समय देशमा राम्रो साङ्गीतिक भविष्यलाई छोडेर अमेरिका पस्ने गायकगायिकाहरुको सूचि लामो हुन्छ । कर्ण दास, राजु लामा, सञ्जीप प्रधान, सरिश्मा अमात्य, संजीव सिंह, सपनाश्री यस्तै यस्तै अरु नाम पनि यसमा जोडिन सक्छन् । तर कोही चाहिँ विदेशको राम्रो जागीर, सम्भावना र भविष्यलाई छोडेर नेपाल फर्किएका छन् । त्यस्ता केही व्यक्तिमध्ये एक हुन्, आजका हाम्रा अतिथि । यी अतिथिले त्यसो त भर्खरै मात्र पहिलो एल्बम बजारमा ल्याएका छन् । तर पहिलो एल्बमका भिडियो र गीतहरुले पनि चर्चा पाउन थालिसकेका छन् ।

यी अतिथि हुन्, आर्य । रोचक कुरा के छ भने आर्य आफ्नो थर बताउन चाहँदैनन् । उनको मान्यता छ, कलाकारको जात, थर र सीमा हुनुहुन्न । अमेरिकाको अलाबामा राज्यमा पढाइका लागि अमेरिका पसेका उनले उतै ग्रीन कार्ड अप्लाई गरेका थिए । अप्लाई गरेअनुसार उनी त्यहाँ ग्रीन कार्ड पाउन पनि सफल भए । यसपछि उनको साङ्गीतिक सफर शुरु भयो । उनले त्यहाँ अनेक किसिमका हण्डर र ठक्कर खानु पर्‍यो । अन्ततः त्यहाँका नेपालीहरुबीच उनले एउटा पहिचान बनाउन सफल भए । केही समयअघि अमेरिकाको न्यूयोर्कमा आयोजित एनआरएन अर्थात् नेपाल बाहिर बस्ने नेपालीहरुको ठूलो भेलामा उनले गीत गाउने अवसर पाए । तीन हजार भन्दा बढी व्यक्तिको भेलामा उनले पहिलो पटक गीत र नृत्य कला प्रस्तुत गरेर सबैको मन जित्न सफल भएका थिए । त्यसपछि उनी अमेरिकाभित्रै लोकप्रिय बने ।

उनलाई यसपछि देशभित्रै नाम र इज्जत कमाउने इच्छाले गम्भीर बनायो र अहिले पहिलो एल्बम आर्य बोकेर आइपुगेका छन् । यो एल्बमको सबै कार्य अमेरिकामा नै भइसकेको थियो । उनले यसको भिडियो पनि अमेरिकामा नै बनाइसकेका थिए । उनका संघर्ष, नेपालबाहिरका नेपालीहरुको संघर्ष र डाक्टर बनाउने बाबुआमाको सपनाका वावजूद उनको सङ्गीत मोहका विषयमा आज तपाइँलाई कुराकानी सुनाउने छु ।

तपाइँको नाम के हो ? किन आर्य मात्र भन्नुहुन्छ ?
खासमा नागरिकतामा त आर्य सौरभ नै हो । तर भन्दा आर्य मात्र भन्छु । कुनै पनि जात, रंग आदिमा आफूलाई क्याटगोराइज गर्न नखोजेको मात्र हो । किनभने कलाकारको कुनै जात, रंग हुँदैन । मैले गीत लेख्दा कुनै समूहका लागि लेख्दिनँ, नेपाली भएर नेपालीका लागि लेख्छु । त्यसैले मलाई मेरो परिचय आर्य मात्रै भए पनि पुग्छ भन्ने लाग्छ ।

तपाइँको बाल्यकाल जनकपुर, वीरगञ्ज, नेपालगञ्जतिर बित्यो भन्ने थाहा भयो, तर किन ?
बुवा जनकपुरको हुनुहुन्थ्यो, सरकारी जागीरमा हुनुहुन्थ्यो । जागीरको सिलसिलामा म पनि उहाँहरुलाई पछ्याउँदै जानु पर्‍यो । त्यसैले मेरा बालककालका धेरै स्मृतिहरु जनकपुर, वीरगञ्ज र नेपालगञ्जतिरका छन् ।

तपाइँको पिताजी रमेश आर्य निकै विद्वान र धेरै किताबका लेखक पनि हुनुहुन्थ्यो, उहाँहरुको तपाइँलाई के बनाउने इच्छा थियो ?
बुवा पीएचडी हुनुहुन्थ्यो, टुरिजममा । त्यसैले पनि म धेरै पढुँ भन्ने वा डाक्टर बनुँ भन्ने थियो । तर मेरो रुचि चाहिँ मिडियामा थियो ।

बच्चा बेलामा तपाइँ चाहिँ के बन्छु भन्ने सोच्नु हुन्थ्यो ?
बच्चादेखि नै गाउँथेँ । तर बच्चाबेलामा त के राम्रो के नराम्रो भन्ने थाहा हुँदैनथ्यो । त्यसबेला आफू के बन्ने भन्ने कुरा बुवाआमाले देखाएको बाटो नै हुन्छ । तर कलेज पढ्न जब म इण्डिया गएँ, त्यहाँ गीतार बजाउन थालेपछि मात्र मैले गीत गुन्गुनाउने, लेख्ने गर्न थालेको हुँ ।

तपाइँको पिताजी पनि सङ्गीतमा निकै रुचि राख्नु हुन्थ्यो अरे, हो ?
बुवा जनकपुरमा हुँदा जनकपुर कला परिषद स्थापना गर्नुभएको थियो । २०२८ सालमा सारङ्गी भन्ने साहित्यिक पत्रिका पनि पहिलो पटक निकाल्नु भएको थियो । प्रकाश श्रेष्ठ, ज्ञानु राणाजस्ता गायकगायिकाहरुले वीरगञ्जमा फण्ड रेजका कार्यक्रममा बोलाउनु हुन्थ्यो । कार्यक्रम अर्गनाइज गर्ने हुनाले उहाँको भित्री रुचि संगीतमा थियो । गीतार, बाँसुरी, मेण्डोलिन आदि बजाउनु हुन्छ । 

कुन बेला तपाइँलाई लाग्यो, मेरो रुचिको विषय म्युजिक नै हो भनेर ?

यहाँ आएपछि हिट्स एफएममा दुइ वर्ष काम गरेँ । रेडियोमा काम गर्दै जाँदा म्युजिकसँग नजिकको सम्बन्ध बन्यो । तर अमेरिका पुगेपछि त्यहाँ वातावरणका कारण अंग्रेजीमा गीत लेख्न थालेँ । 'माइ लब' रेकर्ड गर्दा जुन संघर्ष गरेँ, त्यो अहिले सम्झँदा मेरो सबैभन्दा ठूलो प्रेम म्युजिक रहेछ भन्ने थाहा भयो ।

पहिलो पटक तपाइँले हिन्दी गीतको नेपाली अनुवाद गर्नु भएर आफूले लेखेको गीत भन्दै देखाउनु हुन्थ्यो अरे नि ?
१० वर्षको उमेरमा शम्भुजीत बासकोटाको एउटा एल्बम निकाल्नु भएको थियो । त्यो चाहिँ हिन्दी गीतको नेपाली अनुवाद हुन्थ्यो । मैले पनि यस्तो गर्न सक्छु भनेर हिन्दी गीतलाई नेपाली भाषामा उल्था गरेर मेरो वरिपरि सुनाउने गर्थेँ । तर पछि मेरो चोरी पक्डाउ पर्‍यो । अनि अर्काको नक्कली गीत गाउन छाडेँ ।

तपाइँ डाक्टर हुनुहोस् भनेर तपाइँको ममीले निकै मिहिनेत गर्नुहुन्थ्यो, फर्म ल्याइदिनेदेखि धेरै थोकमा सघाउनु हुन्थ्यो रे हो ?
सत्य हो । म डाक्टर बनुँ भन्ने ममी बाबाको ठूलो इन्ट्रेस्ट थियो । मलाई चाहिँ म्युजिकमा रुचि । म त्यसबेला मिडियामा काम गर्न थालिसकेकोले मेरो व्यस्ततालाई हेर्दै ममीले फर्म ल्याइदिने, भरिदिने र पुर्‍याइदिनेसम्मको काम गर्नु हुन्थ्यो ।

पछि हिट्स एफएममा जागीर खान थाल्नु भयो नि ?
मलाई मिडियामा काम गर्नु ठूलो रुचि थियो । त्यसैले साथी मार्फत् हिट्स एफएममा भ्याकेन्सी छ भन्ने थाहा पाएपछि अप्लाई गरेँ र काम पनि पाएँ ।

तपाइँ त पहिलो दिन नै हिट्स एफएमका सञ्चालकको काखैमा बसिदिनु भएछ ?
इन्टरभ्यूको दिन गएको थिएँ, नजिकै साथीलाई देखेपछि यति एक्साइटेड भएँ कि अर्को कुर्चीमा को बसिरहेको छ भन्ने नै विचार गरेनछु । र, गएर सनी श्रेष्ठ (हिट्स एफएमका सञ्चालक) को काखैमा बसिदिएछु । तर यो कुरालाई उहाँले माइण्ड गर्नु भएन ।

रेडियोमा काम गर्नु कत्तिको चुनौतिपूर्ण काम हो ?
त्यसबेला एफएम एकदमै नयाँ कुरा थियो । खुला हृदयले कार्यक्रम चलाउनु मिडियामा गाह्रो छ । तर मैले त्यो फ्रिडम हिट्स एफएममा पाएको थिएँ । कतिपय नयाँ काम गर्दा मैले सिनियरहरुबाट झपर्‍याइँ पनि खाएको थिएँ । तर एफएम सञ्चालक ममाथि विश्वास गर्नु हुने भएकाले मलाई गाह्रो चाहिँ भएन ।

रेडियोमा आफूलाई अरुभन्दा अलग देखाउन अनेक नाटक गर्नुहुन्थ्यो रे नि ?
गुड ओल्ड डेज कार्यक्रममा एउटा किसिमको फर्म्याट हुने गर्दथ्यो । तर चौथो पटकदेखि फरम्याट फलो गर्न रुचि लागेन । सरप्राइज दिन मंगल ग्रहबाट निम्त्याएको पाहुना आफैँले बोलेको थिएँ । यो धेरैलाई पचेन तर र्सवसाधारणले मन पराएका थिए । त्यस्ता अनेकन प्रयोग गरेँ । इफेक्टहरु खेलेर कार्यक्रमलाई रोचक बनाउन कुनै कसर छाडिनँ ।

कुन बेला लाग्यो अब रेडियो छोडेर अरु नै केही गर्नुपर्छ भनेर ?
दुइ वर्ष काम गरेपछि अमेरिका जाने चान्स पाएँ । त्यसबेला रेडियोपछि के त ? भन्ने प्रश्न आउँदा मैले इमेज च्यानलमा प्रयास गरेको थिएँ तर काम पाइनँ । अमेरिका या एफएममध्ये एउटा छान्दा मैले अमेरिका छानेँ । शुरुमा म आईटी पढ्न चाहन्थेँ । तर यसबेला पढाइपछि म सङ्गीतमै लागेँ । विभिन्न स्थानीय बार र क्लबहरुमा मैले गाउन शुरु गरेँ ।

छोरा वा छोरी जोसुकै भएपछि आमाबाबुको सपना ठूलो कुरा हुँदो रहेछ कि आफ्नो इच्छा ठूलो कुरा हुँदो रहेछ ?
जे गरे पनि राम्रो नाम हुने काम गर्नुपर्छ, र्सवसाधारणले सधैँ सम्झिऊन् भन्ने कुरा भनिरहनु हुन्थ्यो । डाक्टर मात्र ठूलो कुरा होइन भन्ने कुरा पनि हुन्थ्यो । प्रोफेशन मात्र अर्कै छानेँ मैले तर सर्वसाधारणले सम्झिने काम नै रोजेको छु । नाम कमाउने र अरुका दुःखपीडाका गीत गाउने वा अरुलाई नचाउने गीत गाउने नै काम गरेको छु । जुन नराम्रो होइन ।

तपाइँले त अमेरिकामा विभिन्न म्युजिक कम्पनीमा आफ्नो अडियो एल्बम मेल गर्दै पठाउँदै गर्नु भएछ, कस्तो रह्यो त्यस्को अनुभव ?
अमेरिका जति ठूलो देश त्यति ठूलो प्रतिस्पर्धा । मलाई आइडिया नभएका कारण मैले मेरो अडियो एल्बम सप्पै कम्पनीलाई पठाउने गर्दथेँ । तर पछि मलाई महसूस भयो कि यत्रो ठूलो देशमा यस्ता क्यासेट त हजारौँ हुन्छन्, कसलाई हेर्ने फूर्सद होला र ? त्यसपछि कुनै एउटा च्यानल भएर मात्र जानु पर्छ भन्ने मलाई लाग्यो ।

पछि त तपाइँ न्यूयोर्कमा मोडलिङ गर्न आइपुग्नु भएछ नि ? कसरी ?
मेरो एक जना साथीको ममीले एउटा एसियन लुक चाहिएको रहेछ, मलाई न्यूयोर्क जान सल्लाह दिनु भएको थियो । मेरो फोटो खिचेर न्यूयोर्क पठाइदिनु भयो । एमएएआई (मोडलिङ एशोसिएशन अफ अमेरिका इन्टरनेशनल) ले गरेको कार्यक्रममा भाग लिने अवसर पाएँ ।

त्यो बेला तपाइँले साना ठूला गरी तीन वटा अवार्ड जित्नु भएछ, त्यो चाहिँ कसरी ?
बेस्ट फोटोजेनिक फेस, बेस्ट सेमाइप्रोफेशनल रनवे मोडल (फस्ट रनरअप), बेस्ट सिंगर (सेकेण्ड रनरअप) जितेको थिएँ । मैले बेस्ट सिंगरमा माई लब गीत गाएको थिएँ ।

तपाइँले त्यसबेला म्युजिकमा कसरी जम्ने भनेर कस्ता संघर्ष गर्नु भयो ?
हिपहप क्लबमा अफ्रिकन अमेरिकनहरु मात्र थिए । ग्यांगस्टर र्‍याप रहेछ, थाहै नभई त्यहाँ पनि भाग लिएँ । मेरो त सफ्ट म्युजिक थियो, उनीहरुको चाहिँ अलि कडा भाषा । मुभिन ग्रुभिन गीत गाउनुअघि मैले गाएको फलो गर भन्दा उनीहरुले त्यो फलो गरे । त्यो एउटा अनौठो सफलता थियो । त्यसपछि मलाई स्टेजमा कन्फिडेन्ट दिलायो ।

तपाइँलाई कुन बेला लाग्यो, संगीतमा म जम्न सक्छु, दर्शकहरुलाई हल्लाउन सक्छु ?
एएनएको भेला २००५ मा भएको थियो । जसमा मैले पर्फम गरेँ । त्यो पनि रुचाइएकाले मेरो कन्फिडेन्ट बढेर आयो । त्यहाँको स्थानीय कार्यक्रममा त्यसपछि म लोकप्रिय हुन थालेँ । त्यहाँ तीन हजारभन्दा बढीको भीडमा पहिलो पटक पर्फ गर्दा ममा निकै आत्मविश्वास पलायो ।

तपाइँको यो नयाँ एल्बम आर्य अमेरिकामा नै रेकर्ड गर्नु भएको हो ?
ट्रयाकहरु त्यहीँ बनाएको थिएँ । माया र नशा गीतको भोकल पनि त्यहीँ रेकर्ड गरेको थिएँ । बाँकी गीतको रेकर्डिङ चाहिँ यहीँ गरेको थिएँ ।

त्यहाँ रेकर्डिङ गर्नुअघि पनि तपाइँले अंग्रेजीमा एल्बम बनाउनु भएको थियो रे, हो ?
ल्याण्डन ग्रीस भन्ने साथीसँग मेरो राम्रो जम्यो । जसका कारण अर्कै किसिमको गीत बन्यो । यही धुन र अंग्रेजी शब्दमा हामीले एल्बम बनाएका थियौँ । स्थानीय कर्न्र्सट र यताउति बेच्दा २०० सय सीडी बेचेँ तर नेपाली समुदायमा चाहिँ यो राम्रो बिक्री भयो । त्यही एल्बमलाई खासमा यहाँ रिलिज गरिएको हो- आर्य नामबाट ।

यो एल्बममा तपाइँ निकै कन्फिडेन्ट हुनुहुन्छ जस्तो देखिन्छ ?
शुरुमा म यस्तो थिइनँ । तर त्यो बेला पनि मैले राम्रो गरेँ भन्ने लाग्थ्यो तर हरेक कार्यक्रममा म स्टेज पर्फेन्सको भिडियो दर्जनौँ पटक घरमा गएर हेर्थेँ र भएका कमीकमजोरीलाई सच्याउँथेँ । अझै पनि मैले धेरै गर्न सक्छु भन्ने लागेको छ ।

तपाइँ नेपाल फर्किएर संघर्ष गर्नुको कारण पारिवारिक हो कि तपाइँको भित्री इच्छा ?
त्यहाँ बसेर मैले गर्न खोजेको त नेपाली म्युजिक नै हो । तर त्यहाँ नेपाली कम्युनिटी निकै सानो थियो । तर नेपालमा २ करोड जनतालाई मैले सुनाउन बाँकी नै छ भन्ने लागेकाले म यता फर्किएको हुँ ।

अरु गायकहरु चाहिँ विदेश भनेपछि हुरुक्क हुन्छन्, तर तपाइँ त विदेश छोडेर आउनु भएछ नि ?
अरु कलाकार फाइनान्सियल कुरा हेरेर नै गएको हुनुपर्छ । तर मलाई चाहिँ के लाग्छ भने यहाँ गर्न सके विदेश जानु पर्दैन । अर्काको भरमा काम गर्न खोज्यो भने असफल हुइन्छ । त्यसैले हरेक कुरामा आफू इन्भल्भ भइयो भने माम खान यहाँ गाह्रो हुँदैन ।

तपाइँ यो एल्बमको सफलतामा कत्तिको विश्वस्त हुनुहुन्छ ?
म नेपाल आएको एक महिना मात्र भयो । म आफू कस्तो गायक भनेर चिनाउने भन्दा म पर्फर्मर पनि हुँ भन्ने चिनाउन चाहेको छु । त्यसैले गायनसँगै म आफ्नो कला पनि देखाउन चाहन्छु । मलाई स्टेजमा देखेपछि उहाँहरुले सीडी किनिदिनु भएको थियो । त्यसैले मलाई मेरो ट्रयाक र शैलीमा विश्वास छ ।

अबको तपाइँको योजनाहरु के के छन् त ?
मैले गायन सिकिहरेको छु । शिशिर योगी मेरा भोकल गुरु हुनुहुन्छ । टीभीमा पनि संलग्न हुनसक्छु । तर जे होस्, म मिडियामा नै हुनेछु ।

 
Click Here To Read Previously Posted Article    Click Here To Read Next Article          
 
More on Feature
Related Tags:
लुकेका कुरा ट्रयाक बाहिर गायक विचार उपलब्धि कीर्तिमान गीतकार बजारमा क्या बात ! समुद्रपार नेपाली तारा हल्ला गायिका प्रेम र विवाह सङ्गीतकार रिलिज परिस्थिति कन्सर्ट अवार्ड तातोपीरो
Browse Tags in Other Group
 
 
Tags in Relationship
sex dating divorce cheating kissing marriage honeymoon friends tips gifts breakup infidelity parties know women attracting girls know men attracting guys flirting love personal valentine's day ex-love occassion fun read memories Family
Browse all Tags in Group
Tag groups: cinema, city sightings, city updates, fashion & grooming, health, misc, music, relationship, technology, television, weird & interesting, work and office,
 
 
Your Name: City Country
Your Email:
Rate this Article: 
Comments:
Security Code: