Home» Life Style »Body and Mind

सम्झनाको लहरमा केहीबेर

- सामीप्य तिमल्सिना

हिजोआज हरेक कुरा चाँडो चाँडो बद्लिइरहेका छन् । बद्लावको यो श्रृङ्खला वस्तुबाट विचारसम्म र विचारबाट चेतनासम्म चलिरहेको छ । विगतका कतिपय मूल्य, मान्यता, संस्कार आज हाम्रालागि आउट डेटेड भएका छन् । हामी विगतका यस्ता कुरालाई नमान्दा आफूमा भयङ्कर क्रान्तिकारी भएको महसूस गर्र्छौँ ।

मलाई सम्झना छ, आजभन्दा दश बाह्र वर्षघि गाउँघरमा ढोका खुलै राखेर हिँड्दा पनि कुनै अनिष्टताको कल्पना गर्न सक्तैनथ्यौँ । मूल ढोकामा ताल्चा लगाउनु पर्दैनथ्यो । ढोकामा सिक्री लगाउनुको मतलब हुन्थ्यो, कुकुरहरु घरको मझेरीसम्म नपुगून् । तर त्यतिबेला कुकुरहरु पनि यति इमान्दार हुन्थे कि घरको मूल ढोका काटेर सकेसम्म पस्दैनथे र पसिहाले पनि ओर्याइँ गर्दैनथे । आज अवस्था एकदम बद्लिइसकेको छ । आजभोलि घरको के कुरा, आफूनै सही सलामत घर पुगिएला कि नपुगिएला भन्ने ठेगान हुन्न ।

परिवर्तन प्रकृतिको शाश्वत नियम हो । विज्ञानले गरेको चमत्कारिक प्रगतिले आजको जीवन धेरै सहज बनेको छ । महिनौँ हिँडेर नपुगिने बाटो हामी क्षणभरमै काट्न सक्छौँ । संसारको जुनसुकै ठाउँका बारेमा जानकारी लिन सक्छौँ । शाश्वत परिवर्तनले दिएका यस्ता धेरै उपहारहरु उपभोग गर्न पाएकोमा हामी विज्ञानप्रति अनुगृहित छौँ पनि । तर यो क्रममा हामीले त्यो महत्वपूर्ण चिज गुमाएका छौँ, जसलाई हामी विशेष अवस्थामा मानवता भनेर सम्झन्छौँ ।

मेरो आफ्नै कुरा गरौँ । पहिले पहिले बटुवाहरुले पानी खान माग्दा म आफैँले कतिलाई हार्दिकताका साथ मोही खुवाएर पठाएको छु । म जुन ठाउँमा हुर्किएँ बढेँ (खोटाङ जिल्ला), त्यो ठाउँमा पानी लिनका लागि एक घण्टाको ओरालो बाटो हिँड्नु पर्दथ्यो । पानी लिएर फर्कँदा झन् गाग्रीको भारीसहितको उकालो ! बाटोको घर थियो हाम्रो । तिर्खालु बटुवाहरुको सधैँ घुइँचो । बिहानभरि पानी बोकेर दिउँसो काममा गएर र्फकँदा गाग्री रित्तै । तर एक दिन पनि बटुवालाई पानी खुवाएर सकियो, हामी पानी बोक्न सक्तैनौँ भनेर घरका स्त्रीले प्रतिवाद गरेको सम्झना छैन मलाई ।

तर आज मौका परे एक थोपा पानीको पनि पैसा लिन पछि पर्दैनौँ हामी । त्यसैले कहिलेकाहीँ आफैँलाई धिक्कार लाग्छ, यति धेरै परिवर्तन हुनु परेकोमा । त्यसैले कहिलेकाहीँ प्रश्न उठ्छ, के असल मूल्य मान्यता, परोपकार, दयाको भावनालाई तिलाञ्जल नदिइकन आजको वैज्ञानिक श्रेष्ठताको भोग गर्न पाइँदैनथ्यो ? भौतिकवादी हुनलाई मानवतावादको घाँटी नै निमोठ्नु पर्ने थियो ? किन यी दुवै कुरा काँधमा काँध मिलाएर जान सक्तैनन् ? परिवर्तनको यो कस्तो महंगो मूल्य तिर्नुपरिरहेको छ, जहाँ हामीले आफूले आफैँलाई खोज्नु परिरहेको छ ।

म यो भन्दिनँ कि आज हामी कसैलाई दयामाया गर्दैनौँ, स्नेह, सद्भाव गदैनौँ, गर्र्छौँ तर ती सबैलाई आफ्नो अहंकारी स्वरुपसँग समतुल्य बनाएर हेर्र्छौँ वा भनुँ त्यसमा स्वाभाविकता देखिन्न । जस्तो हामी अचेल के गर्र्छौँ भने हाम्रो केही आफन्तको स्वर्गारोहण भयो भने स्वर्गारोहण हुनेको भन्दा ठूलो फन्टमा आफ्नो नाम राखेर पत्रिकामा श्रद्धाञ्जली छपाउँछौँ । हामीले गर्ने प्रेम पत्रिकामा श्रद्धाञ्जलीको विज्ञापनबीच कस्तो सम्बन्ध हुन्छ, बुझ्न सकेको छैन मैले । तपाइँले कसैलाई स्नेह गर्नुहुन्छ भने त्यो दुनियाँलाई बताइरहनु पर्छ ।

कतो हो, एउटा कथा पढेजस्तो लाग्छ, एउटा गाउँ थियो । त्यहाँका मान्छेहरु खान, लाउन पाए पनि दुःखी थिए, असन्तुष्टीका कारण । त्यही गाउँमा एउटी बूढी महिला पनि बस्तथिइन् । जो अरुका लुगा सिलाएर जीविका चलाउँथिन् । एक दिन जुनेली रातमा उनले आँगनमा आफूले लुगा सिलाउने सियो हरायो भनेर कोकोहोलो मच्चाइन् । सारा गाउँले भेला भएर सियो खोज्न थाले तर सियो मरिगए भेटिएन । थकित भएर मान्छेले बूढी महिलालाई सोध्यो- "तपाइँको सियो आँगनमा कसरी हरायो ?"

बूढी महिलाले भनिन्- "भित्र बसेर लुगा सिउँदै थिएँ, यसो काम परेर उठेँ तर फर्किँदा त सियो बेपत्ता ! बूढी महिलाको यो कुरा सुनेर सारा गाउँले रिसाउनसम्म रिसाए । भित्र हराएको सियो घरबाहिर खोजेकोमा खिल्ली उडाए । त्यतिबेला महिलाले गाउँलेलाई यत्ति मात्र भनिन्- "मैले तिमीहरुलाई यही कुरा बुझाउन खोजेकी । जुन वस्तु जहाँ हराएको हो, त्यही खोजे मात्र भेटिन्छ ।" महिलाको यो कुरा सुनेर गाउँलेहरुको शीर तिनप्रति नतमस्तक भयो ।

आज हाम्रो अवस्था ती अज्ञानी गाउँलेको जस्तै छ । हामी त्यो ठाउँबाट र त्यो माध्यमबाट सुख खोजिरहेका छौँ, जसले आफ्नोपनलाई वास्ता गर्दैन । आज हामी सुखका लागि डान्स क्लब, रेष्टुराँ र नजाने कहाँ कहाँ जान्छौँ । तर कोही भोको मान्छेलाई पेटभरि खुवाएर त्यसबाट पाउने आनन्द, शुभाशिष लिन चाहँदैनौँ । आखिर किन बद्लिइरहेका छौँ हामी ?

 
Click Here To Read Previously Posted Article    Click Here To Read Next Article          
 
More on Body and Mind
Related Tags:
अनुभव memories ex-love flirting know women gifts attracting guys marriage occassion infidelity cheating family personal tips dating valentine's day attracting girls know men fun read love
Browse Tags in Other Group
 
 
Tags in Cinema
सेक्स अभिनेता अभिनेत्री सेलेब्रिटी रिलिज समारोह सुटिङ हल्ला पेज थ्री प्रविधि
Browse all Tags in Group
Tag groups: cinema, city sightings, city updates, fashion & grooming, health, misc, music, relationship, technology, television, weird & interesting, work and office,